ما تجـيكش عـجب .. !!

السلام عليكم ورحمة الله وبركاته...


ما تجـيكش عـجب .. !!


إيلا مشات البنة لي كانت فـ الأعياد ..

حيت صلة الرحم ما بقاتش بين العباد ..

ملي ولينا معاشرين التيليفونات و الآيباد ..

كولشي خاشي عينيه فـ البيسي و عليه فـ البيت ساد ..

مشات أيام العيد الزينة مع لجداد ..

ما تڭولش ليا لا ؛ راه تبدلات العقلية فـ لبلاد ..

راه النية لي مشات و السم ما بين الناس تزاد ..

ملي محمد على والو مخاصم مع عماد ..

ملي ولات فتيحة حاقدة على سعاد ..

ملي هادا يشعل العوافي و لاخر يزيد لعواد ..

ملي لقلوب قصاحت كثر من الحجر و الفولاد ..



البنة ما بـقاتـش ..



ملي خلينا الفقير ڭالس نهار العيد بالجوع ..

ساكت كايتألم و الضربة واصلة ليه للضلوع ..

و حنا قدامنا لماكلة محطوطة من كل نوع ..

مال هذا مايعاون هذا ومال الخير ولا ممنوع ..

الشوا و اللحومات شي هابط اُو شي مرفوع ..

و نسينا لي عايش مقهور فـ لبلاد اُو مقموع ..

عندو الله وحدو يدعي ليه في كل سجدة و ركوع ..

دير الخير اُو خيط المحبة ما يبقاش مقطوع ..

الدنيا فانية ما تخليوش الشر بيناتنا مزروع ..

مهم هادي مناسبة قست فيها هاد الموضوع ..

نتمنا الميساج يوصل و الصوت يكون مسموع ..


منقول ....تقبل الله منا ومنكم