السلام عليكم ورحمة الله وبركاته.
يا هاد الراجل لعيد قرب وانت ماجايب اخبار..!!
ما شريت لا فاخر و لا مجمار..!!
ناري و نسيت حتى العطرية و الإبزار..!!
كلشي تقاضى ما بقى والو فالدار..!!
يا ربي تلطف تقول كاين شي اعصار..!!
الناس خايدة تشري بالكركار..!!
ها البرقوق ها البصلة و الخيار..!!
ولي بغا حتى الشاقور والمنشار..!!
إوى توكل على الواحد القهار..!!
وسير تقضى و وزن بالعبار ..!!
وانا ندير أتاي و نخمل الدار..!!
وعنداك تنسى جيب الطبالي معند النجار..!!
ياالضاوية شحال قدني نعقل خصني دفتار..!!
عارفك حادڭة و تاتخمي فحوايج الدار..!!
وسعداتي بيك عرفت ما نختار..!!
مشا المتخار على سعدو بقا يعزل و يختار..!!
جاب حولي وافي و جا راجع للدار..!!
إوا سمعوا يا هاد الناس الاخيار..!!
صدقو مدابزين على الكبش فوسط النهار ..!!
يا الراجل ناري جبت حولي قدو قد الفار ..!!
شوف قداش جابو المعطي الجار..!!
قدو قداش و قرونو كبار..!!
يا مراتي ماني ملعّق راني غي خضار..!!
هدشي لي قديت عليه وهدا مابغات لقدار..!!
مزال كريدي الادوات وكسوة دراري الصغار..!!
حمدي الله ونقصي من لفشوش والتعفار..!!
والله يلى هادشي حشومة وعيب وعار ..!!
راه العيد سنة ما فيه لا معاندة ولا تحكار..!!
الله يرزقنا غي الصحة و طولت لعمار..!!
منقول ....تقبل الله منا ومنكم
